Во Хрватска вчера попладне се случи тешка сообраќајна несреќа со фатален исход. На делницата од Јадранската магистрала кај населбата Буница, близу Сењ, патничко возило со загрепски регистарски таблички излетало од патот и паднало во морето. Според Полициската управа Лика-Сењ, несреќата се случила околу 16:30 часот и завршила со смрт на четири лица.
Итните служби веднаш пристигнале на терен, а во спасувачката акција биле вклучени и нуркачи од Хрватската планинска служба за спасување (HGSS) од Госпиќ. Телата на двајца мажи и две жени биле извлечени од морето. „По повикот од МУП, четворица спасувачи и двајца нуркачи тргнавме кон Сењ. Со полициски брод стигнавме до местото и во возилото под водата пронајдовме три жртви, а уште едно тело плуташе“, изјави Дарио Циндриќ, началник на станицата Госпиќ при HGSS.
Истрагата на местото е завршена, а како што изјави портпаролката Маја Брозичевиќ, ќе следи кривична постапка за да се утврдат сите околности на несреќата. Дополнителен проблем претставувала и силната бура што го зафатила регионот, поради која било воведено ограничување на сообраќајот – за возила од I и II категорија бил забранет премин на државниот пат DC8 Сењ–Карлобаг.
Според неофицијални информации на РТЛ, автомобилот бил изнајмен на аеродромот „Д-р Фрањо Туѓман“ во Загреб, што отвора сомнеж дека жртвите можеби се странски државјани. Официјалниот идентитет на загинатите ќе биде потврден по завршувањето на обдукцијата.
Овој трагичен настан повторно ја отвора темата за безбедноста на Јадранската магистрала, каде што непредвидливите временски услови и тесните делници често резултираат со фатални несреќи.
