Турција бележи импресивен раст на туристичкиот сектор, со приход од над 50 милијарди американски долари (околу 45 милијарди евра) во првите девет месеци од 2025 година – што претставува зголемување од 5,7 проценти во однос на истиот период минатата година.
Покрај тоа, земјата забележала и раст од 1,6 проценти во бројот на странски туристи, односно околу 50 милиони посетители го посетиле турскиот брег и историските знаменитости во 2025 година.
Според податоците на агенцијата на Обединетите нации за туризам, Турција во 2024 година била четврта најпосетувана туристичка дестинација во светот. Странските туристи во просек престојувале по 10,3 ноќи, со просечна дневна потрошувачка од 90 евра по лице, што е зголемување од 7 проценти во однос на лани.
Министерот за култура и туризам на Турција, Мехмет Нури Ерсој, изјави дека резултатите се „историски“ и дека земјата, и покрај бројните предизвици, успеала да го надмине прагот од 50 милијарди долари уште во третото тримесечје.
„И покрај регионалните конфликти и климатските промени, нашата стратегија за стабилен и одржлив туризам даде резултати. До крајот на годината очекуваме да ја достигнеме целта од 64 милијарди долари приход“, изјави Ерсој.
Според статистиките, руските туристи остануваат најбројни – 5,33 милиони посетители, додека Германците се втори со 5,22 милиони, а Британците трети со 3,54 милиони гости во првите девет месеци од 2025 година.
