Црногорската полиција уапсила 25-годишен државјанин на Србија, осомничен дека во текот на летната сезона извршил повеќе кражби на плажите во Будва.
Според соопштението на полицијата, по повеќе пријави од граѓани за украдени чанти, пари, вредни предмети и лични документи, службениците од Одделението за безбедност Будва започнале засилени активности за откривање на сторителот.
Во рамките на истрагата бил идентификуван С.К.(25), за кого постоеле основи на сомнение дека извршил повеќе кривични дела кражба.
По неговото лоцирање, полицијата организирала целна акција под назив „Заседа“, при што осомничениот бил пронајден и приведен во службените простории.
За случајот бил известен надлежниот државен обвинител од Основното државно обвинителство во Котор, кој наредил 25-годишникот да биде лишен од слобода поради сомнение за сторено продолжено кривично дело „кражба“.
Од полицијата информираат дека осомничениот, заедно со кривична пријава, ќе биде спроведен пред надлежното обвинителство за понатамошна постапка.
