Израелскиот министер за одбрана Израел Кац изјави дека Израел и САД ќе ги интензивираат нападите врз Иран во наредните денови, што укажува на можна нова фаза на ескалација на конфликтот. Изјавата ја даде по консултациите со високи воени претставници во штабот на армијата во Тел Авив.
Според Кац, нападите ќе бидат директно насочени кон иранското раководство и клучните структури на моќ, со цел да се ослабне командниот систем и стратешките капацитети на земјата. Тој нагласи дека Израел е решен да ја продолжи кампањата сè додека не се елиминираат сите закани за безбедноста на државата и интересите на САД во регионот.
„Целта е обезглавување на командантите и уништување на стратешките капацитети“, порача Кац, потенцирајќи дека операциите ќе продолжат со засилен интензитет.
Во меѓувреме, американскиот претседател Доналд Трамп изјави дека размислува за можноста за прекин на кампањата против Иран, додавајќи дека САД се блиску до остварување на своите цели во конфликтот. Овие изјави доаѓаат во момент кога ситуацијата на Блискиот Исток останува исклучително напната, со зголемен ризик од поширока регионална конфронтација.
