Американскиот претседател Доналд Трамп во саботата најави дека во наредните две недели ќе поднесе тужба против банката JPMorgan Chase, тврдејќи дека бил изложен на дискриминација и „неточно дебанкирање“ по немирите во Капитол на 6 јануари 2021 година.
Најавата доаѓа по напис на весникот „Волстрит џурнал“, во кој се тврди дека Трамп му понудил на извршниот директор на JPMorgan Chase, Џејми Дајмон, да стане претседател на американските Федерални резерви – нешто што Трамп јавно го негираше.
Во објава на социјалните мрежи, Трамп повтори дека по настаните од 6 јануари неколку банки, меѓу кои JPMorgan Chase и Bank of America, одбиле да прифатат негови депозити. Тој тврди дека одлуките биле политички мотивирани, додека двете финансиски институции ги отфрлија обвинувањата и нагласија дека не постапувале врз основа на политичка припадност.
Џејми Дајмон изјави дека никогаш не добил понуда да ја води Федералната резерва и додаде дека економските состојби се развиваат подобро отколку што се очекувало. Портпаролката на JPMorgan Chase, Триш Векслер, соопшти дека банката им служи на повеќе од 80 милиони Американци и дека смета оти ничија сметка не треба да биде затворена поради политички или верски убедувања. Таа додаде дека институцијата ги поддржува напорите за спречување на политичко исклучување од банкарскиот систем.
Во меѓувреме, тензиите меѓу Трамп и раководството на Федералните резерви продолжуваат. Минатата недела, Дајмон предупреди дека нападите на Трамп врз актуелниот претседател на ФЕД, Џером Пауел, ја загрозуваат независноста на централната банка и може да доведат до повисоки каматни стапки и раст на инфлацијата. Трамп возврати дека неговите критики се оправдани и дека, според него, во ФЕД има „лошо раководство“.
Дополнително, Пауел се соочува со кривична истрага од Министерството за правда на САД, поврзана со наводна злоупотреба на јавни средства при обновата на седиштето на Федералните резерви. Пауел тврди дека централната банка е мета поради несогласувањата со Трамп околу каматната политика, додека Трамп изјави дека не бил запознаен со истрагата пред таа да стане јавна.
Трамп упати и остри критики кон „Волстрит џурнал“, оценувајќи дека весникот не ги проверува доволно фактите и дека неговиот кредибилитет опаѓа. Потсетување дека минатата година тој поднесе тужба против сопственикот на весникот Руперт Мардок и двајца новинари, барајќи отштета од 10 милијарди долари поради наводна клевета.
