Просторот околу Скопското Кале се наоѓа пред значајна урбанистичка трансформација, но овојпат со јасен приоритет за јавниот интерес над комерцијалната градба. Новите детални урбанистички планови, усвоени од Советот на Општина Центар, предвидуваат паркови, спортски објекти, пешачки врски и велосипедски патеки, наместо претходно планираните хотели.
Со плановите се опфатени Градска четврт ЦС 14 „Кале и СРЦ Кале“ и Градска четврт ЦС 01 „Француски гробишта, Тетовска трошарина и Парк 2“. Ова е првпат да се носи подетална урбанистичка документација за просторот околу Калето, со цел регулирање на пристапот, движењето и намената на земјиштето во ова чувствително подрачје.
Најголемата промена е што јавниот интерес се става на прво место. Во Градска четврт ЦС 01 се предвидува спортски објект на државно земјиште покрај кејот со површина од 9.295 квадратни метри, додека на други позиции ќе има парковско зеленило, јавни содржини и паркинг. Под Калето на приватното земјиште се дозволуваат хотели, но со пониска катност, до П+3, во спротивност со претходните планови за поголеми комплекси.
ДУП-от предвидува и нови велосипедски патеки на улиците „Самоилова“ и „Лазар Личеноски“, со поврзување кон патеката покрај Вардар, како и пошироки тротоари и нови дрвореди. Предвидени се и можности за музејски изложби на отворено, со што Калето се третира како културно-историска точка, а не само како локација за градба.
Овој план не ја менува само градбената матрица, туку испраќа и јасна порака: јавниот простор се вреднува и се заштитува. Сега предизвикот е дали планот ќе се реализира во согласност со визијата на хартија и дали Скопје ќе добие повеќе отворени, зеленилни и спортски површини за граѓаните.
