Хрватскиот новинар Домагој Маргетиќ поднесе кривична пријава пред обвинителите во Милано против српскиот претседател Александар Вучиќ, обвинувајќи го за наводна вмешаност во аферата позната како „Сараевско сафари“. Според Маргетиќ, странски снајперисти, меѓу кои Италијанци и други државјани, наводно плаќале на српската војска за да пукаат во цивили за задоволство за време на војната во Босна и Херцеговина.
Вучиќ ги негираше овие обвинувања и истакна дека се „невистини и бесмислени приказни кои се појавуваат во критични моменти за Србија“. Тој додаде дека никогаш не учествувал во наводни акции со пушка во Сараево и дека бил присутен како новинарски помошник, носејќи камера, а не како војник. Вучиќ најави дека ќе ангажира адвокати и ќе ги тужи медиумите кои шират лажни информации, а добиените средства ќе ги наменат за хуманитарни цели и за обновување манастир.
Во пријавата, Маргетиќ тврди дека Вучиќ во 1992 и 1993 година бил дел од паравоена единица под контрола на Српската радикална партија, командувана од Славко Алексиќ, стационирана на Еврејските гробишта во Сараево. Според новинарот, Вучиќ и другите доброволци во единицата биле единствените кои можеле да комуницираат со странските снајперисти, бидејќи тие знаеле странски јазик. Маргетиќ исто така наведува и видеоснимка на која Вучиќ држи снајпер, како доказ за неговата наводна улога.
Истрагата во Милано започна минатата недела, со цел да се идентификуваат странските граѓани кои можеби учествувале во наводните злосторства. Ако се докаже дека убивале цивили за задоволство, тие ќе се соочат со обвинение за убиство со умисла со отежнувачки околности.
Истражителите тврдат дека групите „снајперски туристи“ ги платиле војниците на армијата на Радован Караџиќ за транспорт до ридовите околу Сараево и за овозможување на пукање во цивили, за време на најдолгата опсада во модерната историја, во која од 1992 до 1996 година загинале повеќе од 10.000 луѓе.
Кривичната пријава произлезе од истражувањето на писателот од Милано, Ецио Гавацени, кој собрал докази, како и од извештајот на поранешната градоначалничка на Сараево, Бенџамина Кариќ. Според Гавацени, во групата учествувале Италијанци, Германци, Французи, Англичани и други странци, кои не имале политички или религиозни мотиви, туку се движеле од задоволство и лична забава.
Оваа кривична пријава предизвика внимание во Европа и потенцијално може да доведе до истрага за меѓународна вмешаност во злосторствата во Сараево.
