Силните снежни врнежи предизвикаа целосен прекин на авионскиот сообраќај на аеродромот во Франкфурт, еден од најпрометните во Европа. Операциите беа стопирани околу 15 часот по локално време, кога поради насобран снег на пистите не беше можно ниту полетување, ниту слетување на авиони.
Операторот на аеродромот, Fraport AG, соопшти дека најмалку 67 летови од вкупно 922 планирани за тој ден биле откажани, додека околу десет авиони биле пренасочени кон аеродромот во Штутгарт. Патниците останале заглавени во терминалите, додека службите се бореле со временските услови.
Пистите повторно беа ставени во функција околу 16:15 часот, но од Фрапорт предупредија дека и покрај обновените операции, може да се очекуваат доцнења и застои во текот на денот поради натрупаниот распоред.
На сите патници им беше упатен апел редовно да ја проверуваат состојбата на своите летови директно кај авиокомпаниите, бидејќи ситуацијата останува променлива во зависност од временските услови.
