Зеленски: Украина останува на ставот за 30-дневен прекин на огнот, Москва сè уште молчи
Украинскиот претседател Володимир Зеленски порача дека Киев останува доследен на својот предлог за 30-дневен прекин на огнот со Русија, и покрај тоа што од страна на Москва сè уште нема официјален одговор.
„Предлогот на Украина за прекин на непријателствата и воспоставување најмалку еден месец примирје и понатаму е валиден. Не се откажуваме од иницијативата што би можела да ѝ даде шанса на дипломатијата“, изјави Зеленски во своето редовно ноќно обраќање објавено на платформата Х (поранешен Твитер).
Во својата изјава тој исто така нагласи дека е „апсолутно праведно што руското небо – небото на агресорот – денес не е мирно“, признавајќи дека Украина изведува напади со дронови врз цели на територија на Руската Федерација, пренесува Ројтерс.
Зеленски се обрати само неколку часа пред да стапи во сила едностраната понуда на Москва за тридневен прекин на огнот, предложен по повод одбележувањето на годишнината од победата над нацистичка Германија во Втората светска војна.
