Претседателот на Украина, Володимир Зеленски, штотуку го прифати предлогот на Владимир Путин за директни разговори во Истанбул во четврток, но изјави дека неговиот тим очекува Москва да се согласи на „траен“ прекин на огнот, со почеток од утре 12 мај, пренесува Гардијан.
Во објава на социјалната мрежа Икс, Зеленски, без експлицитно да одговори на поканата на Путин за разговори во Турција, напиша:
„Позитивен знак е што Русите конечно почнаа да размислуваат за завршување на војната. Целиот свет го чека ова многу долго време. А првиот вистински чекор кон завршување на која било која војна е прекин на огнот. Нема смисла убивањата да продолжат дури и еден ден повеќе. Очекуваме Русија да го потврди прекинот на огнот – целосен, траен и доверлив – почнувајќи од утре, 12 мај, и Украина е подготвена да се сретне.“
И покрај повикот на Владимир Путин за т.н. мировни преговори, Русија во неделата изврши напад со дронови врз Киев и други делови од Украина, при што едно лице е повредено во регионот околу главниот град, а неколку приватни домови се оштетени, соопштија украинските власти.
Нападот започнал околу 2 часот по полноќ, при што руските сили лансирале 108 дронови (вклучувајќи и мамки) од повеќе насоки, соопшти украинските воздухопловни сили.
До 09:30 часот, украинската ПВО успеала да собори 60 дронови над источните, северните, јужните и централните региони на Украина, соопшти воздухопловството.
Дополнително, уште 41 дрон се изгубил од радар, но не предизвикал штета.
Нема непосредни информации за жртви, но украинското воздухопловство изјави дека регионот Суми – кој се граничи со руската Курска област – е погоден од нападот, без да наведе повеќе детали.
Претседателот на Франција, Емануел Макрон, утринава одговори на предлогот на Владимир Путин преку објава на Икс, тој напиша:
„Во Киев и заедно со претседателот Трамп, дадовме јасен предлог: безусловен прекин на огнот од 30 дена, почнувајќи од понеделник. Претседателот Зеленски се обврза без да постави никакви услови. Сега очекуваме еднакво јасен одговор од Русија.Нема преговори додека зборуваат оружјата. Нема дијалог ако истовремено се бомбардираат цивили. Потребен е прекин на огнот сега, за да можат да започнат преговорите. За мир.“
Макрон, силен поддржувач на Киев, претходно изјави дека секој мировен договор мора да „не претставува капитулација на Украина“ и треба да биде поддржан со безбедносни гаранции.
