Ескалацијата на конфликтот на Блискиот Исток добива нова, поопасна димензија, откако Иран започна нов бран напади со балистички ракети и дронови кон земјите од Заливот, додека Израел објави дека изведува воздушни удари директно во центарот на Техеран.
Министерството за одбрана на Обединетите Арапски Емирати соопшти дека нивната противвоздушна одбрана активно пресретнува ракети и беспилотни летала лансирани од Иран. Властите ги предупредија граѓаните дека силните звуци што се слушаат се резултат на овие пресретнувања.
Во исто време, Саудиска Арабија потврди дека кон Ријад биле истрелани три балистички ракети – една е успешно пресретната, додека другите паднале во ненаселени области. Во текот на ноќта биле соборени и пет дронови.
Заливските држави од почетокот на конфликтот се цел на ирански напади, кои Техеран ги оправдува како одговор на заедничката офанзива на САД и Израел.
Од друга страна, израелската армија соопшти дека спроведува напади „во срцето на Техеран“, само еден ден по жестоките ирански напади врз јужен Израел. Во погодените градови Арад и Димона има повеќе од 100 повредени, меѓу кои и деца, како и значителна материјална штета.
И покрај тоа што Димона се наоѓа во близина на клучен нуклеарен истражувачки центар, Меѓународната агенција за атомска енергија соопшти дека нема индикации за оштетување на објектот.
Конфликтот очигледно влегува во нова, многу поопасна фаза, со директни напади врз повеќе држави и сè поголем ризик од широка регионална дестабилизација.
