Голема спасувачка операција е во тек во Истанбул, откако рано утрово дошло до уривање на првите три ката од седумкатна зграда во населбата Малтепе. Несреќата се случила околу 5:40 часот на улицата Догу, во населбата Џевизли, а причината за уривањето засега не е утврдена.
Веднаш по пријавувањето на несреќата, на терен биле испратени сите надлежни служби, меѓу кои пожарникари, полицајци, медицински екипи и припадници на Управата за управување со катастрофи и вонредни состојби (AFAD).
Спасувачките екипи најпрво ги евакуирале жителите кои останале во становите на повисоките катови, кои не биле урнати. Паралелно со евакуацијата, започнала и детална потрага низ урнатините во обид да се утврди дали има луѓе заробени под урнатата конструкција.
Утврдено е дека текстилната работилница која се наоѓала на приземјето во моментот на уривањето била празна.
Во спасувачката операција биле ангажирани и кучиња трагачи. Со нивна помош спасувачите досега извлекле пет лица од урнатините, меѓу кои и две деца. На повредените веднаш им била укажана медицинска помош, по што биле пренесени во блиските болници.
Во текот на интервенцијата, здравствени проблеми почувствувал и еден пожарникар, кој исто така бил префрлен во болница.
На местото на несреќата се ангажирани голем број спасувачи и опрема. Противпожарната служба испратила 175 лица со 56 возила и кучиња трагачи, додека AFAD на терен има 25 лица, пет возила и две кучиња трагачи.
Полицијата ги затворила пристапните патишта и ја обезбедила пошироката област околу зградата, со цел спасувачите да можат непречено да работат. Поради опасноста од дополнително уривање, припадниците на спасувачките служби влегуваат во објектот со голема претпазливост и под строги безбедносни мерки.
Гувернерот откри колку лица се водат како жители
Канцеларијата на гувернерот на Истанбул потврди дека првите три ката од зградата се урнале околу 5:40 часот и дека надлежните служби веднаш биле активирани.
На местото пристигнал и гувернерот на Истанбул, Давут Ѓул, заедно со началникот на полицијата во Истанбул, Селами Јилдиз.
Ѓул пред медиумите објаснил дека зградата била изградена во 1987 година. На приземјето имало деловен простор, додека над него се наоѓале шест станбени ката со вкупно 12 станови.
Според официјалните податоци, во зградата биле пријавени 33 лица. Уривањето ги зафатило четирите станови кои се наоѓале на првите три ката, а во нив според евиденцијата биле пријавени вкупно 14 лица.
„Според нашите записи, во овие станови се пријавени вкупно 14 лица. Досега утврдивме дека двајца од станарите биле во нивниот роден град. Од преостанатите 12 лица, петмина се спасени, воспоставивме контакт со четворица, а потрагата по тројца продолжува“, изјавил гувернерот.
Ѓул нагласил дека причините за уривањето ќе бидат предмет на судска и административна истрага. Спасувачката операција продолжува под координација на AFAD, додека за евакуираните станари ќе биде обезбедено сместување во хотел преку оваа институција.
„Никој не е во животна опасност“
На прашањето за здравствената состојба на лицата кои досега биле спасени, гувернерот изјавил дека ниту еден од нив не е во животна опасност.
„Никој не е во животна опасност. Им посакувам на сите брзо закрепнување“, рекол Ѓул.
Според проценките на надлежните, можно е околу седум лица да се наоѓаат под урнатините. Сепак, гувернерот нагласил дека оваа бројка не може да се смета за конечна, бидејќи во становите во моментот на уривањето можеби имало гости, а можно е и некои од регистрираните жители да биле надвор од објектот.
Приоритет во овој момент е спасувачите што е можно побрзо, но пред сè безбедно, да ја завршат потрагата и да ги извлечат евентуално заробените лица. Истовремено, се води грижа за евакуираните станари и за повредените.
Како дополнителна мерка на претпазливост, надлежните наредиле евакуација и на околните згради, поради ризикот поврзан со состојбата на урнатиот објект.
Ќе се проверува дали имало пропусти
Министерството за внатрешни работи на Турција веќе презело чекори за утврдување на околностите кои довеле до несреќата. Назначени се двајца административни инспектори кои ќе треба да испитаат дали имало небрежност, пропусти или одговорност кај јавни службеници.
Истрагата ќе ги опфати процесите поврзани со зградата, почнувајќи од нејзиното планирање и изградба, па сè до евентуалните подоцнежни измени и интервенции врз објектот.
Причината за уривањето засега останува предмет на истрага, додека спасувачките екипи продолжуваат со пребарувањето на урнатините и со напорите да утврдат дали има уште лица кои се наоѓаат под срушениот дел од зградата.
