Турскиот бизнисмен Али Емре Бали (46), чие име во последните недели се поврзува со голема истрага за наводни неправилности на пазарот на инвестициски фондови, бил пронајден мртов во својот автомобил во Истанбул.
Неговата смрт се случила на истиот ден кога компанијата на чие чело се наоѓал не успеала да изврши доспеана исплата кон инвеститорите, што дополнително го насочило вниманието кон случајот, објави турскиот портал „Sozcu.com.tr“.
Бали на 6 октомври бил пронајден во возило во областа Чекмекој. Случајот го презело Јавното обвинителство во Истанбул, кое веднаш започнало со собирање докази и утврдување на околностите под кои дошло до смртта.
Засега нема официјална потврда за причината за смртта, ниту е утврдено дали таа е поврзана со актуелната истрага за инвестициските фондови. Обвинителството продолжува со истрагата.
Бали бил претседател на управниот одбор на компанијата „Adil Varlik Jonetim“ и важел за еден од позначајните луѓе во турскиот финансиски сектор.
Во истрагата се опфатени 131 фонд и стотици лица
Неговото име се појавило во јавноста во рамките на голема истрага поврзана со инвестициски фондови, во која турските власти наредиле ликвидација на 131 фонд.
Кризата опфатила повеќе од 450.000 инвеститори, додека вкупната вредност на имотот во фондовите достигнувала околу 20 милијарди долари.
Турското обвинителство покренало постапки против стотици лица поради сомневања за манипулации на пазарот и неправилности во работењето на фондовите.
Дополнително внимание предизвикал и случајот со компанијата на Бали, која токму на 6 октомври требало да изврши исплата на доспеан долг поврзан со еден финансиски инструмент.
Според официјалното известување, исплатата на главнината и приносот не била реализирана бидејќи компанијата не ги префрлила потребните средства во системот.
Во турските извештаи се наведува вкупен износ од околу 615,9 милиони турски лири, што е приближно 11 милиони евра. Од оваа сума, околу 500 милиони лири, односно приближно 9 милиони евра, се однесувале на главнината, додека околу 115,9 милиони лири, или околу 2 милиони евра, биле поврзани со приносот.
Сепак, засега нема официјална потврда дека неуспешната исплата има каква било поврзаност со смртта на Бали.
Ердоган се вклучи во решавањето на финансиската криза
Во справувањето со кризата директно се вклучил и турскиот претседател Реџеп Таип Ердоган.
На 29 септември тој претседавал со состанок на кој учествувале економскиот тим на владата и раководителите на клучните финансиски институции.
На состанокот било договорено формирање Фондски координативен одбор, предводен од потпретседателот Џевдет Јилмаз.
Одборот има задача да го координира процесот на ликвидација на проблематичните фондови, како и исплатата на средствата кон инвеститорите.
Ердоган како приоритети ги издвоил заштитата на правата на инвеститорите и реализацијата на исплатите на што е можно поправеден начин и во најкус можен рок.
Покрај тоа, тој му наложил на Државниот надзорен одбор (DDK) да го испита работењето на инвестициските фондови, но и начинот на кој надлежните институции го надгледувале пазарот.
Целта на проверката е, покрај справувањето со актуелната криза, да се утврди дали имало пропусти во надзорот и да се разгледа можноста за заострување на правилата со цел да се спречи повторување на слични случаи.
Неколку дена подоцна, Фондскиот координативен одбор разгледувал конкретен распоред за исплата на инвеститорите, како и можни измени на законите со кои се регулира пазарот на капитал.
Во меѓувреме, истрагата за смртта на Али Емре Бали продолжува, а надлежните органи треба да ги утврдат сите околности околу случајот и евентуалните врски со пошироката финансиска истрага.
