[ВИДЕО] Тешка несреќа на трка во Полска: Автомобил влета во публика, повредени најмалку 15 лица

На автомобилска трка што денеска се одржа во Кросно, Полска, се случи сериозна несреќа, при што најмалку 15 лица се здобија со повреди, од кои четворица се во тешка здравствена состојба.

Инцидентот се случил кога возач на зелено БМВ изгубил контрола врз возилото и излетал од патеката, директно влетувајќи во дел од публиката. Според информациите на британскиот „The Sun“, гледачите биле затекнати и немале време да реагираат.

На социјалните мрежи се појави вознемирувачко видео на кое се гледа моментот кога возилото преминува оградата и удира во гледачите, предизвикувајќи паника и хаос на местото на настанот.

Екипи на брза помош и противпожарни служби веднаш интервенирале, а повредените се пренесени во најблиските болници.

Локалните власти отворија истрага за причините за несреќата, а организаторите на настанот се соочуваат со прашања за безбедносните мерки и организацијата на трката.