Драматични сцени го потресоа Истанбул откако тежок судир меѓу два автомобили завршил со силна експлозија и пожар, при што едно од возилата за само неколку секунди било целосно зафатено од пламен.
Несреќата се случила околу 02:00 часот по полноќ на булеварот „Тургут Озал“ во населбата Јали Махалеси во општината Малтепе. Според првичните информации, автомобилите управувани од Е.Е. и Е.Ј. се судриле на раскрсница, по што настанала вистинска драма.
Од силината на ударот, едното возило излетало надвор од коловозот, а веднаш потоа избувнал пожар проследен со експлозија. За кратко време автомобилот бил претворен во огнена топка, додека очевидците во шок го следеле развојот на настанот.
На местото брзо пристигнале екипи на итната медицинска помош, пожарникари и полициски службеници. Огнот бил локализиран и изгаснат пред да се прошири на околните возила и објекти.
Во несреќата биле повредени двајцата возачи, како и сопатникот Ф.Ш., додека Б.Џ.А. бил пренесен во болница од претпазливост. Сите инволвирани лица биле хоспитализирани за дополнителни прегледи и лекување.
Особено внимание привлече снимката од несреќата, која била забележана со камера поставена на кацигата на мотоциклист што чекал на црвено светло во непосредна близина. На видеото јасно се гледа моментот на судирот, а веднаш потоа и експлозијата што го проголтала едното возило.
Полицијата отвори истрага за утврдување на сите околности и причините што довеле до оваа тешка сообраќајна несреќа.
