Тешка сообраќајна несреќа во германската покраина Горна Баварија однесе три човечки животи и зад себе остави сцени кои длабоко ја потресоа јавноста. Во трагедијата животот го загубило тричлено семејство од Минхен – татко, мајка и нивното двегодишно дете.
Несреќата се случила во раните утрински часови на магистралниот пат Б12, во близина на местото Марктл ам Ин. Според првичните резултати од истрагата, 46-годишниот возач на патничкиот автомобил од засега непознати причини ја напуштил својата сообраќајна лента и навлегол во спротивниот правец.
Во тој момент дошло до силен фронтален судир со камион управуван од 50-годишен возач. Ударот бил толку силен што автомобилот бил речиси целосно уништен. Во него се наоѓале сопругата на возачот, 44-годишна жена, и нивното двегодишно дете.
Спасувачките екипи кои пристигнале на местото на несреќата се обиделе да интервенираат, но за трите лица немало спас. Сите починале на самото место поради тешките повреди што ги здобиле, останувајќи заробени во уништеното возило.
Возачот на камионот поминал со полесни повреди и веднаш му била укажана медицинска помош. Полицијата продолжува да ги утврдува точните причини за несреќата, додека сообраќајот на оваа делница бил во прекин неколку часа поради увидот и расчистувањето на теренот.
Трагичниот настан предизвика големо внимание во Германија, особено поради фактот што во несреќата згасна цело семејство, вклучувајќи и мало дете.
