Големи шумски пожари ја зафатија аргентинската Патагонија, при што огнот до сега проголта речиси 15.000 хектари шума. Стотици пожарникари, со поддршка од воздухопловните сили, веќе денови се борат со огнената стихија која се шири со огромна брзина. Најкритична е состојбата во покраината Чубут, каде што властите отворено изразуваат сомнеж дека барем еден од најразорните пожари е намерно подметнат, објавува Примјер Портал.
Најголемиот пожар беснее речиси една недела во планинскиот дел на Чубут и досега уништил околу 12.000 хектари грмушеста површина, како и автохтони и засадени шуми. Поради силниот ветер и сувите услови, огнот се шири неконтролирано, ја преминал државната магистрала број 40 и во моментов претставува сериозна закана за индустриски објекти, училиште и бројни рурални имоти во регионот.
Иако официјалната истрага сè уште е во тек, гувернерот на покраината Чубут, Игнасио Торес, јавно изјави дека е убеден оти пожарот е подметнат. На прес-конференција тој испрати остра порака, нагласувајќи дека одговорните ќе бидат строго казнети.
„Бедниците што го започнаа овој пожар ќе завршат во затвор“, изјави Торес, најавувајќи и парична награда од 50 милиони песоси, односно околу 34.000 долари, за информации што ќе доведат до апсење на сторителите.
Сомневањата ги потврди и обвинителот Карлос Дијаз Мајер, кој изјави дека првичните наоди укажуваат на употреба на забрзувач на горење. „Пожарот започнал со бензин или слична запалива материја, што јасно покажува дека некој свесно сакал да го предизвика“, рече тој, додавајќи дека Канцеларијата на државниот обвинител активно ја води истрагата.
Аргентинската влада мобилизирала огромни ресурси за справување со кризата. Според портпаролот Мануел Адорни, во гаснењето учествуваат 295 пожарникари, 15 воздухопловни единици, специјализирани противпожарни возила со погон на сите тркала и логистичка поддршка од вооружените сили.
Ситуацијата ја следи и меѓународната заедница. Чилеанскиот претседател Габриел Борик понудил помош и предложил заедничка координација во борбата со пожарите, понуда за која аргентинскиот министер за надворешни работи Пабло Кирно јавно изразил благодарност.
Дополнително внимание предизвикува фактот што само еден месец претходно, владата на претседателот Хавиер Милеј, преку истиот портпарол Адорни, објави измени во Законот за земјиште и шуми. Со тие измени се отвора можност меѓународни инвеститори да купуваат изгорено земјиште за производствени цели, што дополнително ги засилува сомнежите и јавната дебата околу причините за овие катастрофални пожари.
