По катастрофалниот земјотрес со јачина од 8,8 степени што ја погоди руската Камчатка, јавноста доби први снимки од сериозни оштетувања во пристаништето Петропавловск-Камчатски. Но, она што најмногу ги вознемирува светските аналитичари е – молкот на Москва.
Само 120 километри од епицентарот се наоѓа Вилучинск – најголемата база на руската Пацифичка флота. Оваа строго чувана воена локација е дом на стратешките нуклеарни подморници од класата „Бореј“ и „Бореј-А“, опремени со интерконтинентални ракети „Булова“. Тоа е и единствената база на рускиот Далечен Исток со капацитет и инфраструктура за одржување на ваков тип оружје.
И додека социјалните мрежи се преплавени со снимки од оштетени пристаништа, пукнати докови и разнишани објекти, од руското Министерство за одбрана – тишина. Нема информации дали некоја подморница била на ремонт или на отворено море за време на земјотресот, ниту каква е состојбата со безбедноста на нуклеарните системи.
Камчатка се наоѓа во рамки на таканаречениот „Пацифички огнен прстен“, регион познат по силни земјотреси и вулканска активност. Но никогаш досега епицентарот на еден толку силен потрес не бил толку блиску до најчуваната воена тајна на Русија.
„Овие подморници не се само превозници на ракети – тие се мобилни нуклеарни силоси“, предупредуваат меѓународни безбедносни аналитичари. Отсуството на било какви официјални информации од страна на руските власти ја поттикнува загриженоста – дали нешто навистина се случило? И ако се случило, зошто никој не зборува за тоа?
Во моментот, светот не го загрижува само силата на природниот удар – туку и мртвата тишина што доаѓа од база преполна со нуклеарно оружје.
