Унгарскиот премиер, Виктор Орбан, ја искористи конфронтацијата со Украина за да ја засили својата изборна кампања, обвинувајќи Украинците дека планираат напад врз неговото семејство. Сето тоа се случува пред парламентарните избори следниот месец, кои можат да го прекинат неговото 16-годишно владеење.
Во видео објавено во средата навечер, Орбан е снимен како разговара со своите ќерки по телефон, емотивно зборувајќи:
– Сигурен сум дека ќе видите на вестите дека Украинците ми се заканија не само мене, туку и вам. Моите деца и моите внуци… Мораме да го сфатиме ова сериозно, но не смееме да се плашиме.
Неговиот настап следи по изјавите на Хрихориј Омелченко, пензиониран политичар и поранешен член на украинската безбедносна служба (SBU), кој упати закани против Орбан и го повика да го смени својот антиукраински став.
Претседателот Володимир Зеленски се закани дека ќе ја достави адресата на Омелченко на украинските вооружени сили, што предизвика реакции кај европските сојузници да ја намалат реториката.
Односите меѓу Будимпешта и Киев се напнати веќе подолго време, со оглед на тоа што Орбан е еден од најпроруски настроените лидери во ЕУ. Последната ескалација следуваше по тврдењето на Украина дека нафтоводот што транспортира руска нафта до Унгарија бил оштетен од руски беспилотни летала, по што Орбан го блокираше понатамошното продолжување на санкциите кон Русија и дополнителниот заем од 90 милијарди евра за Украина.
Минатиот петок, унгарската антитерористичка полиција заплени конвој украински оклопни возила и уапси седум Украинци кои го придружувале, тврдејќи дека станува збор за перење пари. Конвојот транспортираше десетици милиони евра и 9 кг злато од Виена до Киев.
Седумтемина беа држени во изолација повеќе од 24 часа, а едниот, кој има дијабетес, бил однесен во болница по време на испрашувањето. Според украинското МНР, на него насилно му бил инјектиран лек што предизвикал нагло зголемување на шеќерот во крвта и хипертензија.
Унгарскиот адвокат Лорант Хорват тврди дека постапката била незаконска и дека пристапот до клиентите му бил одбиен.
