Најмалку шест лица загинаа, а уште седум се повредени во силен израелски воздушен напад врз местото Кфар Дунин во јужен Либан, пренесе либанската државна новинска агенција ННА.
Според објавените информации, нападот бил извршен во текот на ноќта, кога израелски авион погодил куќа во населбата. Повредените веднаш биле пренесени во болници во градот Тир, додека спасувачките екипи работеле на терен неколку часа по експлозијата.
Во меѓувреме, израелската армија преку социјалните мрежи издала предупредување за евакуација на жителите на малото гратче Сохмор, кое се наоѓа во долината Беках во источен Либан, поради очекувани нови напади.
Иако прекинот на огнот официјално е во сила од 17 април, тензиите меѓу Израел и проиранската милитантна група Хезболах не престануваат. Израел продолжи со гранатирање на повеќе делови од Либан, додека Хезболах и понатаму презема одговорност за напади врз израелски цели.
Ситуацијата дополнително се влоши откако на 2 март Хезболах изврши напад со балистички ракети врз Израел, тврдејќи дека тоа е одмазда за смртта на иранскиот врховен лидер Али Хамнеи, кој, според наводите, бил убиен на самиот почеток на израелско-американската офанзива против Техеран.
По тој напад, Израел возврати со масовни воздушни операции и копнена инвазија во јужен Либан, што дополнително ја зголеми нестабилноста во регионот.
Според податоците на либанското Министерство за здравство, од почетокот на конфликтот досега загинале 2.869 лица во израелските напади, меѓу кои има и десетици жртви регистрирани по стапувањето во сила на прекинот на огнот.
Во обид да се намалат тензиите, нови разговори меѓу претставници на Либан и Израел се очекуваат во четврток и петок во Вашингтон.
