Вистинска драма се одвивала вчера попладне на еден од патиштата во американската сојузна држава Џорџија, кога мал авион извршил принудно слетување директно на автопат, при што удрил во неколку возила. Инцидентот се случил пред очите на бројни возачи и минувачи, а сцените брзо го обиколија интернетот.
Според информациите што ги објавија американските медиуми, полицијата потврдила дека станува збор за мал едномоторен авион кој, поради проблем за време на летот, бил принуден да слета на средина од патот. Во тој момент, сообраќајот се одвивал нормално, што дополнително ја зголемило опасноста од сериозна несреќа.
Видео-снимка која кружи на социјалните мрежи го прикажува моментот на драматичното слетување, при што авионот се спушта меѓу возилата, а возачите панично се обидуваат да реагираат. Настанот предизвика шок и неверување кај сите кои се нашле во близина.
По несреќата, на патот можеше да се види авионот, идентификуван како „Бичкрафт Хокер Г-36“ од 2010 година, кој летал од Тенеси. Леталото завршило запрено на коловозот, опкружено со оштетени автомобили и збунети минувачи кои се обидувале да сфатат што точно се случило.
Според официјалните информации, авионот слетал на патот Браунс Бриџ во градот Гејнсвил, Џорџија, при што удрил во најмалку две возила пред целосно да застане. За среќа, и покрај сериозноста на ситуацијата, последиците не биле трагични.
Од полициската управа во Гејнсвил соопштија дека се пријавени само полесни повреди. Сепак, не беа објавени детали за тоа колку лица се повредени и под какви околности, додека истрагата за причините за принудното слетување сè уште е во тек.
Инцидентот уште еднаш покажа колку непредвидливи можат да бидат ваквите ситуации и колкава среќа е што овојпат биле избегнати потешки последици, и покрај фактот што авионот слета директно меѓу возила на прометен пат.
