Смртта на Али Лариџани претставува сериозен удар за иранското раководство во момент кога земјата се соочува со војна, внатрешни тензии и растечки меѓународен притисок. Со неговото елиминирање, Иран останува без еден од највлијателните луѓе во државниот апарат, кој со години имал важна улога во носењето на најчувствителните одлуки.
Иако не беше воен командант, Лариџани важеше за клучен стратег во безбедносната и надворешната политика на Исламската Република. Како поранешен секретар на Советот за национална безбедност, тој учествувал во креирањето на ставовите на Техеран во однос на војната, нуклеарната програма и односите со САД и Израел.
Неговата ликвидација доаѓа во период кога неколку високи ирански функционери беа убиени во кус рок, што дополнително ја продлабочува кризата во врвот на власта. Лариџани по атентатот врз Али Хамнеи испрати порака дека Иран е подготвен за долг и тежок судир, а истовремено беше ангажиран во справување со три големи предизвици – воениот конфликт, домашните немири и нуклеарното прашање.
Неговото заминување отвора простор за уште поголемо влијание на воениот врв, кој веќе најавува жесток одговор. Аналитичарите предупредуваат дека тоа може да донесе побрзи, но и понекоординирани потези во исклучително чувствителен момент за земјата.
Дополнителна неизвесност создава и тоа што новиот врховен лидер Моџтаба Хамнеи сè уште не се појавува јавно, што отвора прашања за состојбата во самиот државен врв.
На кус рок, Иран може да влезе во уште понапната фаза со засилен воен одговор и поголема репресија. На подолг рок, загубата на луѓе како Лариџани може сериозно да ја ослабне стабилноста и способноста на системот да функционира.
