Турската фудбалска федерација (ТФФ) суспендираше повеќе од 1.000 фудбалери како дел од скандал со обложување, вклучувајќи го и дефанзивецот на Галатасарај, Ерен Елмали.
Елмали објасни дека пред околу пет години се обложил на натпревар на кој неговиот тим во тоа време не учествувал. Тој и клупскиот колега Метехан Балтачи се меѓу 1.024 фудбалери кои ТФФ ги проследи до дисциплинската комисија. По ова, Елмали е отстранет од националниот состав на Турција за квалификациите за Светското првенство против Шпанија и Бугарија.
ТФФ одлучи да суспендира натпреварите во третата и четвртата лига две недели, додека Суперлигата и втората лига ќе продолжат според планот.
Истрагата откри дека во обложувањето учествувале и повеќе од 150 судии, вклучувајќи седум од елитната категорија и 15 асистенти од највисоко ниво. Дополнително, под истрага се и претседателот на прволигашкиот клуб Ејупспор и поранешниот сопственик на Касимпаша.
„Наша должност е да го подигнеме турскиот фудбал на нивото што го заслужува и да го исчистиме од сета нечистотија“, изјави претседателот на федерацијата, Ибрахим Хаџиосманоглу.
