Турција значително го намали увозот на нафта од руските пристаништа на Црното Море, а во август се очекува дополнителен пад на испораките. Причината се проблемите со транспортот и нарушувањата во работата на терминалите по украинските напади со беспилотни летала.
Според податоците на LSEG, Турција во јули добила околу 900.000 тони нафта од руските пристаништа, наспроти 1,2 милиони тони во јуни.
Особено голем пад е забележан кај испораките преку Црното Море. Во јуни тие изнесувале околу 600.000 тони, додека во јули биле намалени на нешто повеќе од 300.000 тони.
Трендот треба да продолжи и во август, кога се очекува Турција да добие само околу 200.000 тони нафта преку руските црноморски пристаништа.
За овој месец се предвидени испораки со два танкери кои треба да транспортираат казахстанска нафта KEBCO, додека засега нема планирани испораки на CPC Blend или руски Urals за турскиот пазар.
Турските власти претходно ги критикуваа нападите врз танкерите поврзани со Русија во близина на турските територијални води, предупредувајќи дека ваквите инциденти претставуваат ризик за безбедноста на пловидбата и трговијата во Црното Море.
Истовремено, Анкара се обидува да ја намали зависноста од овие рути и да обезбеди алтернативни извори. Според трговците, Турција во август треба да увезе нафта од Бразил и Гвајана за првпат по подолг период.
Дополнителен проблем претставуваат нарушувањата во испораките преку Каспискиот нафтоводен конзорциум (CPC), кој транспортира казахстанска нафта до рускиот брег на Црното Море.
