Американскиот претседател Доналд Трамп испрати остра порака до Иран, нагласувајќи дека Техеран има „последна шанса“ да постигне договор со Соединетите Американски Држави. Воедно, тој предупреди дека доколку дипломатските напори не успеат, Вашингтон е подготвен да преземе многу посилни воени мерки.
Говорејќи пред новинарите во Белата куќа, Трамп изјави дека разговорите меѓу САД и Иран во моментов се одвиваат и дека ситуацијата брзо се движи кон исход, без да открие повеќе детали за текот на преговорите.
Американскиот претседател повтори дека неговата администрација е подготвена за воена интервенција доколку не се постигне договор. Според него, евентуалниот напад би бил „посилен од кој било воен напад од Втората светска војна“, иако додаде дека засега наредил да не се преземаат такви чекори додека сè уште постои можност спорот да се реши по дипломатски пат.
Трамп се осврна и на стратешки важниот Ормуски Теснец, преку кој поминува значителен дел од светскиот транспорт на нафта и гас. Тој порача дека Иран нема да може самостојно да воведува патарини или да го контролира поморскиот сообраќај низ теснецот.
„Ако некој ќе наплаќа патарини, тоа ќе го направиме ние. Имаме целосна контрола. Имаме нешто што се нарекува блокада, челичниот ѕид на САД“, изјави Трамп.
Во една од најострите пораки, американскиот претседател рече дека сака да му даде можност на Иран да избере дипломатско решение пред кризата дополнително да ескалира.
„Сакам да им дадам секоја шанса пред да им бидат отсечени главите“, изјави Трамп, алудирајќи дека времето за договор брзо истекува.
Претходно истиот ден, преку својата социјална мрежа „Truth Social“, Трамп го обвини иранското раководство дека испраќа спротивставени пораки. Според него, иранските претставници приватно бараат разговори со Вашингтон, а потоа јавно тврдат дека директни преговори не постојат. Тој уште еднаш нагласи дека САД нема да дозволат Иран да развие нуклеарно оружје.
Трамп истакна и дека Вашингтон нема да дозволи ништо да минува низ Ормускиот Теснец без американско одобрување сè додека не биде постигнат договор или додека, како што наведе, Иран не се согласи на условите што ги бараат САД.
Во меѓувреме, иранското Министерство за надворешни работи соопшти дека во последните осум дена Иран и Оман воделе конструктивни разговори за воспоставување нов режим на пловидба низ Ормускиот Теснец. Предлогот предвидува воведување единствен коридор за движење на бродовите со јасно определени насоки за влез и излез.
Сепак, портпаролот на иранското Министерство за надворешни работи, Есмаил Багеј, изјави дека евентуалниот договор со Оман нема да биде доволен за повторно нормализирање на сообраќајот низ теснецот.
„Ништо нема да се промени во Ормускиот Теснец додека Вашингтон продолжува со својата агресија и поморска блокада“, порача Багеј.
Тензиите меѓу Вашингтон и Техеран остануваат високи, а исходот од евентуалните преговори би можел значително да влијае врз безбедносната состојба во регионот и врз една од најважните светски поморски рути за транспорт на енергенси.
