Американскиот претседател Доналд Трамп повторно ја крена тензијата со серија остри пораки упатени кон Иран, тврдејќи дека американската поморска блокада е целосно успешна и дека Техеран се соочува со економски и политички колапс.
Во објавите на неговата социјална мрежа Truth Social, Трамп порача дека „ништо не поминува“ без одобрение од САД и ја опиша блокадата како „челичен ѕид“. Според него, Иран повеќе не може да ги сервисира ниту воените трошоци ниту финансиските обврски и брзо се движи кон статус на „неуспешна држава“.
Тој дополнително ја заостри реториката со тврдење дека иранските воени сили се во целосен хаос и дека морнарицата и воздухопловството на земјата се практично неутрализирани.
„Иран е само разговор без акција. Насилникот на Блискиот Исток е мртов“, напиша Трамп, додавајќи дека Техеран предолго чекал за договор и дека сега ќе мора да ја плати цената.
Неговите изјави доаѓаат во исклучително напнат момент на Блискиот Исток. Само неколку часа претходно, иранските сили извршија ракетни и дронски напади врз американски цели во регионот, вклучително и воени објекти во Јордан и Бахреин.
Поради нападите беа активирани системите за противвоздушна одбрана во повеќе земји од Персискиот Залив, а од теренот пристигнаа снимки од експлозии во близина на американски воени инсталации.
Во меѓувреме, кризата продолжува да го потресува и светскиот енергетски пазар. Блокадата на Ормутскиот теснец предизвикува сериозни нарушувања во транспортот на нафта, додека резервите во повеќе држави се намалуваат, што дополнително ја зголемува загриженоста од поширока регионална ескалација.
