Најмалку 64 лица, вклучително и 13 деца, го загубија животот во напад врз болница во Судан, додека 89 се повредени, соопшти Светска здравствена организација, оценувајќи дека ова е уште еден тежок удар врз веќе разорениот здравствен систем во земјата.
Цел на нападот била Наставната болница во Ел-Даеин, главниот град на Источен Дарфур. Меѓу жртвите има и медицински персонал – две медицински сестри и еден лекар, како и пациенти кои во моментот примале терапија.
Според СЗО, сериозно се оштетени педијатрискиот, породилниот и одделот за итна помош, што дополнително ја влошува состојбата за илјадници луѓе кои зависат од оваа установа.
Генералниот директор на СЗО, Тедрос Аданом Гебрејесус, упати силна порака: „Доста е пролевање крв. Здравствената грижа никогаш не смее да биде цел“, повикувајќи на итна деескалација и заштита на цивилите и медицинските работници.
Невладината организација Emergency Lawyers соопшти дека нападот бил директно насочен кон болницата, што дополнително ја засилува загриженоста за намерното таргетирање на цивилни објекти.
Судан веќе речиси три години е зафатен од жесток конфликт меѓу армијата и паравоените Сили за брза поддршка (RSF), при што болници, училишта и станбени зони сè почесто се на удар – вклучително и со дронови.
Според податоците на СЗО, од почетокот на војната се регистрирани најмалку 213 напади врз здравствени објекти, со 2.036 загинати и над 720 повредени.
Регионот Дарфур останува едно од најкрвавите жаришта, каде контролата е поделена, а цивилите ја плаќаат највисоката цена. Обединети нации веќе ја оценија ситуацијата во Судан како најтешка хуманитарна криза во светот.
Извор: Скопје1.мк
