Светската здравствена организација предупредува дека бактериите сè побрзо развиваат отпорност на антибиотици, што претставува една од најголемите закани за модерната медицина. Според најновите податоци, секоја шеста лабораториски потврдена инфекција денес е предизвикана од бактерии кои веќе не реагираат на стандардните терапии.
Истражувањето на СЗО, спроведено во повеќе од 100 земји и со 23 милиони анализирани податоци, покажува дека отпорноста се зголемила за над 40% помеѓу 2018 и 2023 година. Најпогодени региони се Југоисточна Азија и Источниот Медитеран, каде што секоја трета инфекција е веќе отпорна на лекови.
– Антимикробната отпорност е глобална закана која може да ја врати медицината во мрачното време кога обичните инфекции беа смртоносни – предупредува Иван Утин од СЗО.
Во 2021 година, 7,7 милиони луѓе починале од бактериски инфекции, од кои повеќе од милион директно поради отпорност на антибиотици.
СЗО бара итни вложувања во развој на нови лекови, но и свест кај граѓаните – редовно миење раце, користење дезинфекциски средства, вакцинација и одговорна употреба на антибиотици. „Не секоја треска бара антибиотик. Ако лекарот не ви го препише, тоа значи дека се грижи за вас,“ додава Утин.
