Страшните сцени по пожарот што ја потресе Кран-Монтана во Швајцарија засекогаш ќе останат врежани во сеќавањето на 22-годишниот француски турист Џереми Хална, кој се нашол на местото на трагедијата меѓу првите.
Хална за светските медиуми раскажа дека тој и неговите пријатели веднаш притрчале на помош, уште пред да пристигнат службите за итни случаи. Вели дека вресоците на повредените одекнувале низ ноќта и јасно покажувале колку е сериозна ситуацијата.
„Луѓето беа во ужасна состојба. Вресоците се слушаа насекаде“, сведочи тој.
Двајца од неговите пријатели, без двоумење, влегле во опожарениот објект и извлекле маж кој лежел на подот. Потоа останале со него повеќе од еден час, обидувајќи се да го смират и да му дадат надеж дека ќе преживее.
Во меѓувреме, останатите од групата трчале низ градот, барајќи ќебиња и вода за повредените.
„Ги обиколувавме околните барови за да најдеме што било што може да помогне. Луѓето беа благодарни, а јас дури ја дадов и мојата јакна на еден од повредените“, раскажа Хална.
Тој откри и дека само еден ден претходно бил во барот „Ле Констелејшн“, кој го опиша како тесен подрум со мал влез, нешто што, според него, дополнително ја влошило ситуацијата во моментот на пожарот.
Најтешко, вели, биле сликите што не може да ги избрише од главата.
„Луѓето беа толку тешко изгорени што не можевте ни да ги препознаете. Тие сцени нема никогаш да исчезнат од мојата меморија. Убеден сум дека ова ќе ме трауматизира до крајот на животот“, заврши Хална.
Трагедијата во Кран-Монтана остави длабока трага не само кај семејствата на жртвите, туку и кај сите кои директно сведочеа на драматичните моменти по пожарот.
