Македонската музичка ѕвезда Каролина Гочева беше специјална гостинка во жирито во последната епизода на регионалното музичко шоу „Никогаш не е доцна“, а нејзиното присуство не помина незабележано – не само поради професионалните коментари, туку и поради искреноста со која зборуваше за својот приватен свет.
Во интервју за „Гранд онлајн“, Каролина отвори повеќе лични теми и откри дека е исклучително емотивна личност, која не се срами од солзите и чувствата.
Таа признава дека, иако во одредени ситуации знае да биде многу силна и воздржана, има моменти кога едноставно си дозволува да се опушти и да ги пушти емоциите на слобода.
„Во некои моменти сум навистина силна и знам да се контролирам, но кога сум опуштена, сакам убаво да се исплачам. Плачам на филмови, но и на реклами. Особено божиќните и новогодишните реклами – оние со Дедо Мраз, осамени луѓе и топли човечки приказни – секогаш ме допираат и ме разнежнуваат“, искрено раскажува пејачката.
Каролина се наврати и на своето детство, откривајќи една длабоко лична и трогателна желба која ја носела со себе како дете. За разлика од повеќето деца кои сонуваат за подароци од Дедо Мраз, нејзината желба била поинаква и многу подлабока.
„Сите деца верувавме во Дедо Мраз, но јас имав една посебна желба. Никогаш не сум имала дедо, бидејќи и двата починале пред да се родам. Како мала, мечтаев Дедо Мраз да ми биде дедо. Тоа често ѝ го кажував на баба ми“, се присетува Каролина.
Со оваа исповед, Каролина уште еднаш покажа дека зад успешната кариера и силниот сценски настап стои личност со длабоки емоции, искрени спомени и чувствителна душа која не се плаши да ја покаже својата ранливост.
