Бројот на загинати се приближува до 1.000, додека според последните податоци во Непал 3.925 лица се водат како исчезнати, меѓу кои и 592 странски државјани.
Посебна драма се одвива околу хидроелектраните покрај реката Тришули, каде што се стравува дека повеќе од 600 работници можеби останале заробени во огромна мрежа тунели исполнети со кал и урнатини.
Спасувачките екипи се обидуваат да стигнат до нив со копање и контролирано разбивање на огромните карпи со експлозив, додека во дел од тунелите се пумпа воздух во надеж дека евентуалните преживеани ќе добијат дополнително време.
Семејствата на исчезнатите одбиваат да ја загубат надежта, иако со секој поминат час расте стравот дека шансите за пронаоѓање преживеани се намалуваат.
Според непалскиот премиер Балендра Шах, од локациите на хидроелектраните досега биле спасени 279 лица. Се проценува дека приближно секој седми од исчезнатите работел на хидроенергетски проекти.
Во операцијата учествуваат непалски и кинески воени сили, како и експерти од повеќе земји.
Австралискиот инженер Арнолд Дикс, кој од далечина им помага на непалските власти во подземната спасувачка операција, вели дека една од најголемите тешкотии е воопшто да се утврди каде се наоѓаат влезовите во тунелите.
Поплавите толку многу го промениле теренот што речиси исчезнале сите препознатливи траги.
„Сè едноставно исчезна. Изгледа како површината на Месечината“, изјавил Дикс.
Според него, спасувачите се соочуваат со карпи од огромни размери, од кои некои се поголеми и од куќи. Сепак, тој смета дека сè уште постои надеж, бидејќи подземните простории можеби обезбедиле одредена заштита од огромната сила на водата.
Реките донеле речиси 300 тела
Потресувачка е состојбата и во Читван, низводно од подрачјата кои први биле погодени од поплавите. Според локалните власти, реките до овој регион донеле речиси 300 тела.
Од околу 900 пронајдени тела, според информациите пренесени од непалското Министерство за здравство, досега биле идентификувани само околу четири проценти.
Поради недостиг од простор во ладилниците, властите започнале со привремено погребување на неидентификуваните жртви. Пред погребувањето медицинските екипи земаат ДНК-примероци, за семејствата подоцна да можат да ги идентификуваат и преземат посмртните останки.
„Немаме доволно место во ладилниците. Моравме да ја избереме оваа последна можност и привремено да ги погребаме. Ситуацијата целосно нè преплави“, изјавил локалниот претставник Ганеш Аријал.
На тибетската страна, според официјалните податоци објавени од кинеските државни медиуми, загинале 16 лица, а 546 се водат како исчезнати.
Спасувачката операција продолжува, а најголемото внимание во моментов е насочено кон затрупаните тунели и хидроелектрани, каде што семејствата на исчезнатите сè уште се надеваат дека под земја има преживеани.
