Меѓународниот резидуален механизам за кривични судови започна целосна истрага за околностите под кои почина Ратко Младиќ, кој на 27 август почина за време на хоспитализација во Хаг.
По неговата смрт, холандските власти ги активирале стандардните процедури предвидени со националното законодавство. Веќе следниот ден било потврдено дека нема основа за отворање кривична истрага и дека нема да биде извршена обдукција.
Независно од тоа, Хашкиот механизам одлучил детално да ги провери околностите поврзани со смртта на Младиќ.
Претседателката на Механизмот, судијката Грасиела Гати Сантана, на 27 август наредила целосна истрага, а задачата му била доверена на судијата Иан Бономи.
Бономи пристигнал во Хаг и веќе на 28 август започнал со проверките. Во рамките на истрагата ја посетил Притворската единица на Обединетите нации, како и болничкиот оддел во кој бил сместен Младиќ.
Од Механизмот соопштуваат дека постапката сè уште трае, а деталите за неа во оваа фаза остануваат доверливи.
Во контакт се и со семејството
Хашкиот механизам потврди дека од моментот на смртта е во редовен контакт со семејството на Младиќ.
Разговорите се однесуваат и на организацијата околу пренесувањето на неговите посмртни останки, но дополнителни детали засега не се објавени.
Отворањето на ваква проверка само по себе не значи дека постои сомнение за кривично дело или дека е утврден пропуст во медицинскиот третман. Целта на постапката е да се утврдат и документираат околностите поврзани со неговата смрт.
Ратко Младиќ, поранешен командант на Главниот штаб на Војската на Република Српска, издржуваше доживотна затворска казна откако беше правосилно осуден за геноцидот во Сребреница, злосторства против човештвото и воени злосторства извршени за време на војната во Босна и Херцеговина.
