Британскиот премиер Кир Стармер најави историско зголемување на воената потрошувачка на Обединетото Кралство, до рекордни 5% од БДП до 2035 година – највисоко ниво од времето на Студената војна. Оваа одлука доаѓа непосредно пред самитот на НАТО во Хаг, каде што се очекува и другите членки да се обврзат на истата цел.
Стармер предупреди дека "живееме во време на нестабилност и нови глобални закани", истакнувајќи ја потребата Британија да биде подготвена и за можен директен конфликт. Новата стратегија предвидува вежби со цивилно население, активна подготовка за национален отпор и прецизно насочување на безбедносната политика.
Според владината проценка, одбранбените трошоци ќе се зголемат на 4,1% до 2027, со крајна цел од 5%. Иако не се прецизирани финансиските извори, Стармер увери дека социјалните програми нема да бидат погодени.
Дел од стратегијата е и нов однос со Кина – ќе се продолжи економската соработка, но и ќе се зајакнат мерките против кинеската шпионажа, која британските власти ја сметаат за трајна и софистицирана закана.
Овој потег е и одговор на притисокот од американскиот претседател Доналд Трамп, кој бара Европа да преземе поголема одговорност за својата безбедност.
