За време на средбата меѓу американскиот претседател Доналд Трамп и украинскиот претседател Володимир Зеленски во Овалната соба, еден детал стана центар на внимание – огромна карта на Украина беше поставена директно пред Трамп.
Источниот дел на Украина е обоен, прикажувајќи ги териториите заземени од Русија. На картата се прикажува и процентот на контрола што Русија ја има врз различни региони – на пример, Луганската област е 99% под руска контрола, додека Сумската област е 1%. Зеленски ја покажа целата ситуација на првата линија на фронтот на Трамп, објаснувајќи деталите за бојното поле.
Разговорот со Трамп и европските лидери бил „многу добар“, според Зеленски. Тој истакна дека прво се разговарало за безбедносни гаранции и дека Украина многу ја цени поддршката на САД. Зеленски се заблагодарил и на Меланија Трамп за писмото до Владимир Путин во врска со киднапираните украински деца.
Зеленски потенцира дека е важно за сите чувствителни прашања, вклучително територијални, да се разговара на ниво на лидери и дека Трамп ќе се обиде да организира трилатерален состанок за тоа.
На крајот, Зеленски повторно се заблагодарил за картата, која ја оценил како „добра и корисна“.
