Американскиот претседател Доналд Трамп и неговите најблиски соработници подготвуваат резервна стратегија за продолжување на владините политики доколку Републиканската партија го загуби мнозинството во Конгресот на изборите закажани за 3 ноември.
Според информации на агенцијата „Ројтерс“, високи функционери во Белата куќа со месеци разгледуваат начини претседателот да спроведува дел од својата политичка агенда преку извршни овластувања, без потреба од одобрување од Конгресот.
Reuters
Што предвидува резервниот план?
Во подготовките учествуваат заменик-шефот на кабинетот Стивен Милер, директорот на Канцеларијата за управување и буџет Расел Воут и правниот советник на Белата куќа Вил Шарф.
Меѓу мерките што се разгледуваат се воведување нови царини за увоз на критични минерали и ветерни турбини, построги визни правила за странски студенти и привремени работници, како и мерки за намалување на трошоците за домување и изградба.
Се испитуваат и можностите за користење средства што Конгресот веќе ги одобрил, како и промени во распределбата на федералните субвенции.
Подготовки и за можни истраги
Белата куќа се подготвува и за можноста демократите да започнат конгресни истраги против администрацијата.
Правните советници веќе ги информираат функционерите како да постапуваат при барања за документи, судски повици и сослушувања.
Трамп, против кого во првиот претседателски мандат двапати беше покрената постапка за импичмент, би можел повторно да се соочи со засилен надзор од Конгресот.
Трамп може да користи и претседателско вето
Доколку демократите освојат мнозинство, тие би можеле да блокираат дел од законските предлози на претседателот, но Трамп и понатаму би располагал со правото на вето.
Сепак, претседателските извршни одлуки не се неограничени. Судовите можат да ги поништат мерките што ги надминуваат законските и уставните овластувања.
Белата куќа јавно ги отфрла претпоставките за изборен пораз и нагласува дека администрацијата ќе продолжи со спроведувањето на своите приоритети.
Изборите на 3 ноември ќе одредат кој ќе го контролира Конгресот во преостанатите две години од претседателскиот мандат на Трамп, а со тоа и колкав простор ќе има администрацијата за спроведување на својата програма.
