Необична снимка од Баба Ванѓа повторно привлече внимание на интернет, откако во неа познатата балканска пророчица зборува за мистериозни суштества кои ги опишува како „прекрасни црвенокоси самовили“.
Според нејзините зборови на снимката, тие наводно се наоѓаат насекаде околу луѓето, но човечкото око не може да ги забележи. Ванѓа тврдела и дека животните можат да ги видат овие суштества.
Уште поинтересно е нејзиното тврдење дека ваквите „самовили“ биле присутни и во ноќта што ја поврзувала со губењето на видот.
Баба Ванѓа, чие вистинско име било Вангелија Пандева Гуштерова, е родена во Струмица во 1911 година. Поголемиот дел од животот го поминала во Бугарија, а починала во 1996 година.
Според најпознатата верзија од нејзината биографија, видот го изгубила како млада по силна бура. Подоцна станала позната низ Балканот по тврдењата дека може да ја предвидува иднината и да ја „гледа“ судбината на луѓето.
Со текот на годините на Баба Ванѓа ѝ биле припишани голем број предвидувања – од големи историски настани до тврдења за тоа што ќе му се случува на човештвото илјадници години во иднината.
Сепак, голем дел од најпознатите „пророштва“ треба да се земат со резерва. Ванѓа не оставила систематски пишани записи со сите предвидувања што денес ѝ се припишуваат, па многу од нив до јавноста стигнале преку сведоштва, прераскажувања и подоцнежни толкувања.
Истото важи и за популарното тврдење дека нејзините предвидувања биле „85 проценти точни“ – за таквата бројка нема доволно веродостојни докази.
Приказната за црвенокосите „самовили“ затоа останува дел од мистиката што со децении го следи името на Баба Ванѓа, а не научно потврден феномен.
Видео:
