Јужнокорејската разузнавачка служба (NIS) објави драматични податоци според кои над 2.000 севернокорејски војници загинале додека се бореле на страната на Русија во Украина. Претходните проценки од април говореа за околу 600 загинати, но најновите анализи ја подигнаа бројката повеќекратно.
Според извештаите на јужнокорејските и западните агенции, Пјонгјанг минатата година испратил над 10.000 војници во Русија, главно стационирани во Курската област. Освен војници, Северна Кореја обезбедила и воена опрема, вклучувајќи артилериски гранати, ракети и повеќецевни фрлачи.
Претставникот Ли Сонг-квеун нагласил дека Пјонгјанг има намера да испрати уште 6.000 војници и инженерски тимови, од кои околу 1.000 веќе се распоредени во Русија. Рускиот министер за надворешни работи Сергеј Лавров потврдил дека севернокорејските единици ќе бидат ангажирани како градители и пиро-техничари во Курската област.
Дури во април Северна Кореја јавно призна дека нејзини војници се на руска територија и дека меѓу нив има жртви. Лидерот Ким Џонг Ун изрази сочувство до семејствата на загинатите, а државните медиуми емитуваа емотивни сцени на церемонии со почести за паднатите борци.
Соработката меѓу Москва и Пјонгјанг е дополнително зацврстена со договор за воена поддршка и меѓусебна одбрана, потпишан за време на ретката посета на рускиот претседател Владимир Путин на Северна Кореја минатата година.
