Растечките трошоци за живот предизвикуваат сè поголем притисок врз руските домаќинства, откако сметките за комунални услуги пораснале за повеќе од 50 отсто од почетокот на војната во Украина во 2022 година.
Според Reuters, само во текот на 2026 година комуналните услуги поскапеле за повеќе од 13 отсто, што дополнително ги оптоварува семејните буџети.
Сметка поголема од половина плата
Триесет и четиригодишната наставничка по историја од Москва, Полина Ибрагимова, останала шокирана кога добила сметка за комунални услуги поголема од половина од нејзината месечна плата.
Нејзините трошоци од летото пораснале за околу 25 отсто и достигнале 12.000 рубљи, односно приближно 150 долари.
Поради поскапувањата, мајката на две деца размислува да држи дополнителни приватни часови, а за да заштеди, почнала да ја дели храната на помали порции.
„Се чувствувам како домаќинка од советско време“, изјавила таа.
Реагираат и политичари блиски до Кремљ
Високите сметки предизвикале незадоволство и меѓу политичарите кои традиционално ја поддржуваат руската власт.
Лидерот на Комунистичката партија, Генадиј Зјуганов, му се пожалил на Владимир Путин дека неговата сметка за стан во Москва надминува 30.000 рубљи, сума поголема од просечната руска пензија.
Претседателот на парламентот, Вјачеслав Володин, исто така ги критикувал високите регионални тарифи и побарал интервенција од надлежните институции.
Воените трошоци ја зголемуваат економската неизвесност
Руската економија се соочува со инфлациски притисоци поврзани со зголемените воени расходи, недостигот од работна сила и растечките трошоци за компаниите.
Централната банка ја задржала основната каматна стапка на 14 отсто, додека гувернерката Елвира Набиулина предупредила дека поскапувањето на комуналните услуги дополнително ја отежнува борбата против инфлацијата.
Иако комуналните сметки во Русија и понатаму се пониски отколку во голем дел од Европа, пониските просечни примања прават нивниот раст да биде сериозен товар за многу граѓани.
