Франција започнува национална кампања за подигнување на свеста за репродуктивното здравје, во рамки на која сите жени и мажи на возраст од 29 години ќе добијат посебно информативно писмо за зачувување на плодноста.
Писмата, кои треба да бидат испратени до крајот на ноември преку францускиот систем за здравствено осигурување, се дел од владиниот план за борба против неплодноста.
Целта е граѓаните навремено да добијат информации за факторите што влијаат врз плодноста и можностите за планирање семејство.
Кога треба да се побара лекарска помош?
Во писмото граѓаните ќе бидат охрабрени да се консултираат со здравствени работници пред планирањето бременост.
На паровите што безуспешно се обидуваат да добијат дете им се препорачува да побараат стручна помош по една година обиди доколку жената е помлада од 35 години, односно по шест месеци доколку има 35 или повеќе години.
Покрај возраста, врз плодноста влијаат и исхраната, физичката активност, спиењето, пушењето, алкохолот и одредени здравствени состојби.
Можност за замрзнување јајце-клетки и сперматозоиди
Кампањата ќе ги информира граѓаните и за законските можности за зачувување на репродуктивните клетки.
Во Франција жените можат да замрзнат јајце-клетки од 29 до 37 години, додека мажите можат да зачуваат сперматозоиди од 29 до 45 години.
Интересот за овие постапки постојано расте. Само минатата година повеќе од 20.000 жени побарале замрзнување јајце-клетки, што претставува зголемување од 30 проценти во споредба со претходната година.
Повеќе од три милиони луѓе имаат потешкотии
Според податоците наведени во францускиот план, меѓу 15 и 25 проценти од паровите што сакаат деца се соочуваат со потешкотии при зачнувањето, што опфаќа повеќе од три милиони луѓе.
Француската министерка за здравство Стефани Рист нагласи дека неплодноста е значајно јавно-здравствено прашање што ги засега и жените и мажите.
„Премногу често проблемите се откриваат доцна, иако можеме да реагираме порано, со подобро информирање, превенција и поддршка“, порача министерката.
Покрај писмата, француските власти најавија и посебен информативен интернет-портал, како и едукативни материјали во здравствените установи.
