Вселенски телескоп на НАСА, тежок околу 1.450 килограми, се очекува во среда, 4 ноември, повторно да влезе во Земјината атмосфера, по речиси 22 години научна работа во вселената.
Станува збор за телескопот „Свифт“ (Swift), лансиран во 2004 година за истражување на експлозии на гама-зраци и други високоенергетски космички појави.
Според објавените информации, НАСА проценува дека телескопот ќе навлезе во атмосферата околу 9:30 часот по средноевропско време, но можно е отстапување од дури 11 часа.
Иако се очекува најголемиот дел од леталото да изгори при минувањето низ атмосферата, постои можност одредени делови да стигнат до површината на Земјата.
Кои делови од светот се во потенцијалната зона на пад?
Според објавената карта, можната зона ги опфаќа подрачјата околу екваторот, вклучувајќи делови од Централна и Јужна Америка, Африка, јужна Азија и северна Австралија, како и големи океански пространства.
Европа, вклучително и Македонија, не се наоѓа во наведената потенцијална зона на пад.
Сепак, точната локација на евентуалните остатоци не може однапред да се утврди, бидејќи зависи од моментот кога телескопот ќе навлезе во атмосферата.
НАСА проценува дека ризикот некој да биде повреден од деловите што би можеле да паднат е многу мал, приближно еден спрема 2.100.
По речиси 22 години завршува една значајна вселенска мисија
Телескопот „Свифт“ првично бил проектиран за двегодишна мисија, но продолжил да работи повеќе од две децении. Во тој период придонел за истражување на експлозии на гама-зраци, супернови, црни дупки и други космички појави.
НАСА и американските Вселенски сили продолжуваат да ја следат неговата траекторија и ќе ги ажурираат проценките за времето на влегување во атмосферата.
