Во Соединетите Американски Држави се одржуваат избори за Конгресот, кои претставуваат важен политички тест за претседателот Доналд Трамп на половина од неговиот втор мандат.
Американците избираат 435 членови на Претставничкиот дом и 35 сенатори, а исходот ќе го одреди односот на силите во Конгресот во следните две години.
Републиканците во пресрет на изборите имаат мнозинство во двата дома, додека демократите се обидуваат да преземат контрола барем врз еден од нив.
Се очекува висока излезност
Во сојузната држава Ајова, државниот секретар Пол Пејт најави можност за рекордна излезност, значително поголема од онаа на изборите во 2022 година.
На одредени избирачки места е забележан голем интерес. Во градот Енкени, според податоците што ги пренесува Си-Ен-Ен, до моментот на известувањето гласале 1.740 лица, меѓу кои и 41 новорегистриран гласач.
Посебно внимание привлекува трката за Сенатот во Ајова, каде што се соочуваат републиканката Ешли Хинсон и демократот Џош Турек.
Трамп ги следи изборите од Белата куќа
Американскиот претседател Доналд Трамп изјави дека изборните резултати ќе ги следи од Белата куќа.
Според Си-Ен-Ен, во неговиот политички тим владее претпазлив оптимизам, додека соработниците ги повикуваат граѓаните да излезат на гласање.
Во меѓувреме, медиумите објавија дека Трамп побарал детална проверка на трошењето средства од републиканските политички организации.
Проблеми со гласањето и можни доцнења
Во округот Вестчестер, во сојузната држава Њујорк, се појавиле проблеми со скенирањето на гласачките ливчиња на стотици избирачки места.
Поради техничките потешкотии, дел од ливчињата треба да бидат пренесени на централна локација за пребројување, под полициска придружба.
Изборните претставници уверуваат дека секој глас ќе биде преброен, но предупредуваат дека објавувањето на резултатите може да доцни.
Кога се очекуваат првите резултати?
Првите избирачки места се затвораат во текот на ноќта по македонско време, а пребројувањето ќе продолжи во среда.
Повеќе од 59 милиони Американци веќе гласале пред изборниот ден, според податоците што ги пренесува Си-Би-Ес.
Исходот ќе покаже дали републиканците ќе ја задржат контролата врз двата дома на Конгресот или демократите ќе добијат можност посилно да влијаат врз политиките на администрацијата на Трамп.
