Рекорден број хуманитарни работници биле нападнати минатата година, делумно поради зголемената употреба на вооружени дронови, соопштија денеска Обединетите нации, нарекувајќи го овој тренд „застрашувачки“.
Околу 907 хуманитарни работници биле убиени, повредени или киднапирани во 2025 година, во споредба со 833 една година претходно, според Базата на податоци за безбедноста на хуманитарните работници, платформа финансирана од Канада и Австралија, која прибира податоци за големи безбедносни инциденти што ги погодуваат хуманитарните работници.
Од нив, 350 биле убиени, што е незначително помалку од рекордните 387 во 2024 година, пренесува Ројтерс.
Generalниот секретар на Обединетите нации, Антонио Гутереш, изјави дека нивото на насилство е ужасно и ги повика државите да ги почитуваат правилата на војување и да ги повикаат сторителите на одговорност.
„Служењето на другите стана поопасно од кога било“, изјави тој пред церемониите на ОН планирани за Светскиот ден на хуманитарноста, со знамиња на пола копје во Њујорк и Женева во чест на загинатите.
Шефот на ОН за хуманитарна помош, Том Флечер, изјави дека ширењето на евтини и прилагодливи вооружени дронови во конфликтите ги зголемило ризиците.
Најмногу хуманитарци убиени во Газа
Газа била најсмртоносното место за хуманитарните работници во 2025 година, со 186 убиени хуманитарци таму минатата година, покажа базата на податоци, а по неа следи Судан.
Палестинската агенција на ОН за бегалци пријави најмалку 393 загинати вработени таму од почетокот на војната меѓу Израел и Газа на 7 октомври 2023 година.
