Европол и Британската национална агенција за криминал објавија дека во рамките на голема меѓународна операција наречена „Медуза“ е разоткриена организирана мрежа на лица осомничени за тешки сексуални кривични дела извршени врз нивните партнерки.
Според информациите, во акцијата биле идентификувани 156 лица, меѓу кои жртви и осомничени, а досега се извршени 57 апсења и отворени 113 истраги. Надлежните служби заштитиле 158 потенцијални жртви.
Истрагата покажала дека осомничените користеле шифрирани апликации, интернет-форуми и затворени групи за комуникација, каде разменувале информации, искуства и материјали поврзани со извршените кривични дела, како и совети за избегнување на откривање.
Според Европол, нападите најчесто биле насочени кон жени и во многу случаи траеле подолг временски период, при што сторителите ја злоупотребувале довербата или својата позиција на авторитет.
Надлежните институции посочуваат дека покрај истрагите за сексуални напади, во одделни случаи се водат постапки и за тешки телесни повреди и обид за убиство. Од Европол нагласуваат дека ваквите кривични дела претставуваат организиран криминален модел кој бара координиран меѓународен одговор.
