Руски државјани се соочуваат со можност за депортација од Турција, откако биле приведени во историскиот објект Аја Софија во Истанбул додека читале Библија.
Според информациите што ги пренесуваат руските медиуми, мажот и жената, идентификувани како Викторија и Игор, биле изведени од објектот во понеделникот, по што турските власти покренале постапка против нив.
Како што наведуваат медиумите, парот бил обвинет за наводно поттикнување омраза или непријателство меѓу населението. По приведувањето, биле префрлени во притвор каде што треба да го чекаат понатамошниот исход од постапката и евентуалната депортација.
Информацијата за случајот ја потврдиле и анонимни извори од турската полиција за руската државна агенција ТАСС. Руското Министерство за надворешни работи соопштило дека рускиот конзулат во Истанбул стапил во контакт со адвокатот на приведениот пар.
Случајот предизвика внимание поради местото каде што се случил. Аја Софија, позната и како Света Софија, има повеќевековна и сложена историја. Објектот првично бил изграден во шестиот век како христијанска катедрала во рамките на Византиското Царство.
По османлиското освојување на Константинопол во 1453 година, била претворена во џамија. Во 1934 година, во периодот на секуларните реформи во Турција, добила статус на музеј.
Меѓутоа, во 2020 година, турскиот претседател Реџеп Таип Ердоган го промени тој статус и Аја Софија повторно беше отворена како џамија, иако делови од објектот и понатаму имаат музејска функција.
Според информациите, токму во горната галерија, која се користи како музејски простор, безбедносните служби го затекнале Игор додека ја читал Библијата.
Случајот дополнително привлече внимание поради верското и историското значење на Аја Софија, која со векови претставува едно од најпознатите места во светот поврзани со различни религиски традиции.
