Американскиот претседател Доналд Трамп го одржа завршното предизборно обраќање во Вашингтон, во пресрет на конгресните избори закажани за 3 ноември, при што значителен дел од говорот му посвети на обновениот рефлектирачки базен пред Меморијалниот центар на Абрахам Линколн.
Трамп се пофали со реновирањето на познатото обележје на американската престолнина, а потоа се пошегува дека базенот би можел да го добие неговото име.
„Сериозно размислуваме да го преименуваме во Трампов рефлектирачки базен“, изјави американскиот претседател, по што додаде дека само се шегува.
Реновирањето предизвика бројни критики
Според пишувањето на српски „Курир“, проектот за обновување на базенот предизвикал полемики поради зголемените трошоци и проблемите што се појавиле по завршувањето на работите.
Набргу по повторното отворање, заштитната боја почнала да се лупи, а водата позеленела поради појава на алги, поради што базенот повторно бил затворен.
Според информациите наведени во извештајот, трошоците ја надминале првичната проценка од околу 1,5 милиони долари за повеќе од десет пати, додека работите доцнеле речиси три месеци.
Трамп за проблемите обвинил „левичарски вандали“, но не приложил докази. Според написот, американското обвинителство утврдило дека проблемите со заштитниот слој биле последица на неправилно изведени работи.
Економијата меѓу главните грижи на гласачите
Завршното обраќање се одржа во период кога економските прашања, вклучително и цените на горивата, се меѓу темите што ги загрижуваат американските гласачи.
И покрај тоа, Трамп значителен дел од своето појавување го посвети на обновениот базен, објаснувајќи дека сакал да покаже колку убаво изгледа.
Во политичкиот дел од говорот ги критикуваше демократите и ги бранеше резултатите на својата администрација, особено во областа на даночната политика и граничната безбедност.
Тој призна дека партијата на актуелниот претседател традиционално се соочува со тешкотии на конгресните избори, но нагласи дека републиканците вложиле големи напори во кампањата.
Според извештаите на „Асошиејтед прес“ и „Вашингтон пост“, реновирањето на базенот чинело повеќе од 14 милиони долари, а проблемите со изведбата биле причина за дополнителни поправки.
Конгресните избори на 3 ноември ќе одлучуваат за составот на Претставничкиот дом и дел од Сенатот, а со тоа и за политичкиот однос на силите во Вашингтон.
Видео:
