Во екот на најновата ескалација во војната, Полска рано изутринава ја активираше целата своја воена авијација откако Русија изврши жестоки воздушни напади во западна Украина – на само неколку километри од полската граница.
Оперативната команда на полските вооружени сили соопшти дека е прогласена состојба на готовност за сите борбени авиони и противвоздушни системи, со цел заштита на полскиот воздушен простор. Акцијата е координирана со силите на НАТО, потврдуваат полските власти.
Русија ноќеска лансирала рекордни 728 беспилотни летала и 13 ракети, од кои 718 дронови и седум ракети се соборени, соопштија украинските воздухопловни сили. Воздушната тревога била активирана во 02:15 по средноевропско време, откако Украина ја алармираше јавноста за масовниот напад.
Со оглед на блискоста на нападите до границата со Полска, ризикот од несакани инциденти или прелевање на конфликтот е сè поголем – предупредуваат експерти за безбедност.
Ситуацијата останува напната, а НАТО внимателно ги следи сите движења, со појачано воено присуство во источниот дел на Алијансата.
