Во раните утрински часови во германскиот град Есен, полицијата уапси 27-годишен маж од босанско потекло, осомничен за планирање терористички напад. Оваа акција е дел од поширока истрага која трае неколку недели и се однесува на финансирање на тероризам и организирана измама, јавува „Билд“.
Истражителите го следеле осомничениот со недели, а денеска беа извршени претреси во повеќе градови – Есен, Дортмунд, Дизелдорф и Зест. При претресите биле запленети електронски уреди и други материјали што можат да помогнат во истрагата.
Главната обвинителка Александра Визе објасни дека финансирањето на тероризмот се вршело преку лажно купување и препродажба на скапа електронска опрема, преку што, според проценките, биле собрани најмалку петцифрени суми во евра.
Полицијата наведува дека сериозноста на случајот укажува на тоа дека можело да биде извршен напад со оружје. Уапсениот има воена обука и живее во Есен, додека вториот осомничен е во Дортмунд. Домовите на нивни познаници, кои моментално се сведоци, исто така биле претресени, но нивниот правен статус може да се промени.
Министерот за внатрешни работи на Северна Рајна-Вестфалија, Херберт Ројл, изјави за „Билд“ дека полицијата делувала ефикасно и навремено, спречувајќи потенцијален терористички напад: „Секој што планира тероризам во нашата земја мора да очекува дека специјалните сили навреме ќе дејствуваат и ќе го спречат тоа“.
