Француските безбедносни служби спречиле потенцијален терористички напад во Париз, откако полицијата го уапсила осомничениот пред зградата на Bank of America во осмиот арондисман.
Припадници на специјалната единица БАЦ реагирале навреме и го совладале лицето во момент кога се обидувало да активира импровизирана експлозивна направа.
Малолетник регрутиран преку социјална мрежа
Според првичните информации, осомничениот е 17-годишник, роден во Сенегал, кој живее во регионот Сена-Сен-Дени. Тој наводно бил ангажиран преку апликацијата Snapchat за сума од околу 600 евра.
Малолетникот изјавил дека бил донесен на местото од друго лице, кое веднаш потоа избегало.
Сомнежи за поширока терористичка мрежа
Француското обвинителство за борба против тероризмот отвори итна истрага, додека случајот го презедоа специјализираните служби DPJ-PP и DGSI.
Истражителите разгледуваат можност дека зад обидот за напад стои поширока мрежа, потенцијално поврзана со структури од Иран, особено по серијата напади врз американски и израелски цели низ Европа во последниот период.
Опасна импровизирана направа
Кај осомничениот била пронајдена импровизирана експлозивна направа составена од канистер со запалива течност и цевка со околу 650 грама експлозивен прав, што претставува сериозна закана за околината.
Министерот за внатрешни работи Лоран Нунјез изјави дека брзата реакција на полицијата спречила можен тежок терористички напад.
Истрагата продолжува, а властите трагаат по уште едно лице кое се сомничи дека било вклучено во подготовката на нападот.
