Властите во Јута официјално го затворија 51-годишниот нерешен случај откако новата ДНК технологија потврди дека жртвата, Лора Ен Ејм (17), исчезнала на Ноќта на вештерките во 1974 година, била убиена од серискиот убиец Тед Банди.
Телото на Лора било пронајдено околу еден месец подоцна во кањонот Американ Форк од планинари. Според канцеларијата на шерифот на округот Јута, новите ДНК тестови „непобитно потврдиле дека ДНК доказите пронајдени на телото го потврдуваат присуството на Банди“.
Меѓу 1974 и 1978 година, Банди убил најмалку 30 жени, а бил поврзуван и со други убиства низ САД. Иако Банди ја признал смртта на Лора пред да биде погубен во 1989 година, тој не дал детали за својата улога, па случајот останал отворен сè додека новите анализи не го докажале тоа без сомнеж.
Шерифот на округот Јута, Мајк Смит, изјави дека случајот сега е официјално затворен. Лора Ен Ејм била запаметена како „дружељубив слободен дух со страст кон јахање коњи, лов и грижа за своите помали браќа и сестри“.
Тед Банди бил познат по тоа што жените ги измамувал со шарм или лажна повреда за да ги доведе на осамени места, каде ги убивал. Првпат бил уапсен во 1975 година за киднапирање, успеал да избега неколку пати пред конечно да биде уапсен во 1978 година и погубен во 1989 година.
