Возачите кои патуваат низ Италија во иднина би можеле да се соочат со поинаков начин на пресметување на казните за пречекорување на брзината. Промената е поврзана со предложените измени на италијанскиот Закон за безбедност во сообраќајот, според кои висината на казната би зависела од тоа за колку километри на час возачот го надминал дозволеното ограничување.
Според предложениот модел, за секој километар на час над дозволената брзина би можела да се плаќа казна од 10 евра. Така, на автопат каде што ограничувањето е 130 километри на час, возењето со 140 километри на час би значело казна од 100 евра, додека при брзина од 150 километри на час казната би изнесувала 200 евра. Доколку возачот се движи со 170 километри на час, според овој предлог би можел да биде казнет со 400 евра.
Сепак, овие правила сè уште не се во сила. Станува збор за предлог кој треба да помине низ законската процедура, а постојните правила и опсези на казни во Италија засега остануваат непроменети. Заинтересираните страни имаат можност да предложат измени до 13 септември, додека конечната верзија на законот треба да биде усвоена до 14 октомври 2026 година. Дури по завршувањето на постапката ќе биде познато дали моделот од 10 евра за секој километар на час над ограничувањето ќе стане дел од законската регулатива.
Во меѓувреме, контролата на брзината на италијанските автопати веќе се зајакнува со системот Tutor 3.0. Наместо да ја регистрира само моменталната брзина на возилото, системот ја пресметува просечната брзина меѓу две контролни точки. Тоа значи дека возачите не можат едноставно да забават пред камерата и повторно да забрзаат веднаш потоа, бидејќи се следи нивното просечно движење на контролираниот дел од патот.
